歌词
作词 : 洛桑仁青
作曲 : 曲迈才让
སྐྱ་རེངས་སྐྱ་མཐའ་བཀྱགས་སོང་།
རྩྭ་མགོའི་ཟིལ་པ་འཛུམ་སོང་།
བྱིའུ་ཆུང་གསུང་སྐད་ཀྱུར་ཀྱུར།
བུ་མོ་གཉིད་ལས་དཀྲོགས་སོང་།
རིགས་བཟང་ཆུ་ལེན་བུ་མོ།
ལུས་ལ་རྒྱན་ཆ་སྤྲས་ནས།
གཡང་གི་ཆུ་ཟོམ་ཁ་ལ།
ཧ། འབྲི་མར་སེར་པོས་བརྒྱན་སོང་།
སླས་སྐྲ་རྒྱབ་ལ་གཡུགས་སོང་།
རྨ་བྱའི་སྒྲོ་གུར་ཕུབ་འདྲ།
ཟིལ་ཆུ་ལྷམ་མགོར་ལེན་སོང་།
ལྷམ་ལ་མུ་ཏིག་གཏོར་འདྲ།
རིགས་བཟང་ཆུ་ལེན་བུ་མོ།
བསམ་དོན་ཆུ་ལ་བཅོལ་ནས།
སྟེང་ཕྱོགས་ཨ་སྔོན་གནམ་ལ།
ཧ། ཆུ་ཕུད་ལན་གསུམ་མཆོད་སོང་།
ཧ་ཨ་ཨ་ཨ། ཆུ་ལེན་བུ་མོ།
ཨོ་ཨ་ཨ་ཨ་ཨོ། ཆུ་ལེན་བུ་མོ།
ཚེ་གཅིག་ལུས་ཐོག་འདི་ལ།
མི་རྟག་འཁོར་བའི་སྐྱིད་སྡུག།
ཆུ་ལེན་བུ་མོའི་ལས་དབང་།
ཨོ། ཆུ་ཟོམ་གཉིས་ལ་བསྐོས་སོང་།
བརྩེ་ཞེན་སྐྱོགས་ལ་གཅུས་སོང་།
ཆུ་ཟོམ་འདུན་པས་བཀང་བྱུང་།
ལྡེམ་ལྡེམ་ཡང་བའི་གོམ་འགྲོས།
ཆུ་ལེན་ཁྱིམ་ལ་བསླེབས་སོང་།
རིགས་བཟང་ཆུ་ལེན་བུ་མོ།
ཁྱིམ་ལ་ཆུ་ཐབ་བསྒྲིགས་ནས།
སྦྲ་ནག་གྲུབ་བཞིའི་སྟེང་ལ།
ཧ། དུ་བའི་འཇའ་རིས་འཁྲིགས་སོང་།
ཧ་ཨ་ཨ་ཨ། ཆུ་ལེན་བུ་མོ།
ཨོ་ཨ་ཨ་ཨ་ཨོ། ཆུ་ལེན་བུ་མོ།
ཚེ་གཅིག་ལུས་ཐོག་འདི་ལ།
མི་རྟག་འཁོར་བའི་སྐྱིད་སྡུག།
ཆུ་ལེན་བུ་མོའི་ལས་དབང་།
ཨོ། ཆུ་ཟོམ་གཉིས་ལ་བསྐོས་སོང་།
ཆུ་ཟོམ་གཉིས་ལ་བསྐོས་སོང་།